ប្រមុខរាជរដ្ឋាភិបាលកម្ពុជាសម្តេចអគ្គមហាសេនាបតីតេជោហ៊ុន សែន បានមានប្រសាសន៍ ថាច្បាស់ណាស់គឺគ្មានមេដឹកនាំណាមួយណែនាំពលរដ្ឋខ្លួនមិនឱ្យទៅបោះឆ្នោតទេ មានតែជនអគតិដែលមានបំណងបំផ្លិចបំផ្លាញលទ្ធិប្រជាធិបតេយ្យ និងឆន្ទៈប្រជាពលរដ្ឋទេទើបពួកគេអាចធ្វើដូច្នេះ។
នៅលើបណ្តាញទំនាក់ទំនងសង្គមហ្វេសប៊ុកនៅថ្ងៃពុធ២កើត ខែជេស្ឋ ឆ្នាំច សំរឹទ្ធិស័កព.ស២៥៦២ ត្រូវនឹងថ្ងៃទី១៦ខែឧសភាឆ្នាំ២០១៨ សម្តេចតេជោបានសរសេរថា ថ្ងៃបោះឆ្នោតជ្រើសរើសតំណាងរាស្ត្រគឺកាន់តែខិតជិតមកដល់ហើយ នៅសល់រយៈពេលជាង២ខែទៀតប៉ុណ្ណោះ ។
មកទល់ថ្ងៃទី១៦ ខែឧសភាឆ្នាំ២០១៨ គឺមានគណបក្ស នយោបាយ៥ដូចជា ១-គណបក្សប្រជាជនកម្ពុជា, ២-គណបក្សយុវជនកម្ពុជា, ៣-គណបក្សសញ្ជាតិកម្ពុជា, ៤-គណបក្សខ្មែររួបរួមជាតិ និង៥-គណបក្សហ្វ៊ុនស៊ិនប៉ិច ដែលបានបំពេញបែបបទត្រឹមត្រូវចុះបញ្ជីនិងបាន ទទួលស្គាល់ជាផ្លូវការពីគណៈកម្មាធិការជាតិរៀបចំការបោះឆ្នោត(គ.ជ.ប) ក្នុងការចូលរួមប្រកួតប្រជែង ការបោះឆ្នោតជ្រើសរើសតំណាងរាស្ត្រនៅថ្ងៃទី២៩ខែកក្កដាឆ្នាំ២០១៨ ។
នៅថ្ងៃទី១៦ខែឧសភាឆ្នាំ២០១៨ គឺ គ.ជ.ប នឹងពិនិត្យសម្រេចទទួលស្គាល់គណបក្សនយោបាយមួយចំនួនថែមទៀតដែលបាន បំពេញបែបបទត្រឹមត្រូវរួចរាល់ហើយ ។
យោងតាមចំនួនគណបក្សនយោបាយដែលបានដាក់ពាក្យចុះបញ្ជីចូលរួមប្រកួតប្រជែងការបោះឆ្នោតខាងមុខនេះរួចហើយគឺមានគណបក្សនយោបាយចំនួន ២០ដែល គ.ជ.បកំពុងពិនិត្យ បែបបទថាតើបានបំពេញត្រឹមត្រូវរួចរាល់ហើយឬនៅមានខ្វះខាតអ្វី ។
សម្តេចតេជោបានសរសេរទៀតថា ទន្ទឹមនឹងនេះដែរបើយើងប្រៀបធៀបភាគរយ នៃការចូលរួមបោះឆ្នោត ពីសំណាក់ប្រជាពលរដ្ឋរវាងប្រទេសកម្ពុជានិង សហគមន៍អ៊ឺរ៉ុប និងសហរដ្ឋអាមេរិក គឺអ៊ឺរ៉ុបមានប្រជាពលរដ្ឋទៅបោះឆ្នោតក្នុងរង្វង់ ៣០ភាគរយក៏អាចទទួលយកបាន រីឯសហរដ្ឋអាមេរិក គឺមានពលរដ្ឋទៅបោះឆ្នោតតែ ក្នុងរង្វង់៤០ភាគរយប៉ុណ្ណោះ ។ ប៉ុន្តែចំពោះកម្ពុជាគឺមានពលរដ្ឋជាង ៦៩ភាគរយបានទៅបោះឆ្នោត ។
នេះគឺជាការបង្ហាញយ៉ាងច្បាស់អំពីការរីកចម្រើននៃលទ្ធិប្រជាធិបតេយ្យពិតប្រាកដ នៅក្នុងប្រទេសយើងមិនដូចការបកស្រាយដោយជនអគតិមួយចំនួនឡើយ។
ច្បាស់ណាស់គឺគ្មានមេដឹកនាំណាមួយណែនាំពលរដ្ឋខ្លួន មិនឱ្យទៅបោះឆ្នោតទេ មានតែជនអគតិដែលមានបំណងបំផ្លិចបំផ្លាញលទ្ធិប្រជាធិបតេយ្យនិងឆន្ទៈប្រជាពលរដ្ឋទេទើបពួកគេអាចធ្វើដូច្នេះ ។
សូមបងប្អូនជនរួមជាតិនិងកូន ក្មួយយុវជនទៅបោះឆ្នោតនៅក្នុងថ្ងៃបោះឆ្នោត ថ្ងៃទី២៩ខែកក្កដា ឆ្នាំ២០១៨ខាងមុខទាំងអស់គ្នា។អរគុណបងប្អូន និងកូនក្មួយដែលមានជំនឿជឿជាក់លើការដឹកនាំរបស់ខ្ញុំហើយបន្តបោះឆ្នោតឱ្យគណបក្សប្រជាជនកម្ពុជា ដើម្បីខ្ញុំមាន ឱកាសដឹកនាំប្រទេសជាតិដែលធានាបាននូវសុខសន្តិភាពនិង ការអភិវឌ្ឍគង់វង្សយូរអង្វែង ៕