នៅថ្ងៃទី២២ ខែឧសភា ឆ្នាំ ២០១៨ មន្ត្រីសាខាកាំកុងត្រូលបានសហការជាមួយ មន្ត្រីមន្ទីរពាណិជ្ជកម្ម និងអាជ្ញាធរដែនដី បានចុះត្រួតពិនិត្យផលិតផលទំនិញដាក់តាំងលក់ ដើម្បីស្វែងរកទំនិញខូចគុណភាព ហួសកាលបរិច្ឆេទប្រើប្រាស់ និងទំនិញជាម្ហូបអាហារដែលដាក់សារធាតុគីមីហាមឃាត់ ដើម្បីការពារសុវត្ថិភាពជូនប្រជាជនដោយបានរកឃើញ ទំនិញខូចគុណភាពចម្រុះ ៤២ គីឡូក្រាម ដែលបានដាក់លក់នៅក្នុងផ្សារធំស្ថិតនៅក្នុងស្រុកគាស់ក្រឡខេត្ត បាត់ដំបង យកមករក្សាទុករង់ចាំការដុតកម្ទេចចោល ។
លោក ហាក់ សុខរិន ប្រធានសាខាកាំកុងត្រូលខេត្តបាត់ដំបងបានឱ្យដឹងថា ដើម្បីយកចិត្តទុកដាក់ចំពោះសុខភាពប្រជាពលរដ្ឋជាប្រចាំ ដែលតែងតែធ្វើការចុះត្រួតពិនិត្យនៅតាមបណ្តាលផ្សារនិងផ្ទះដែលដាក់តាំងលក់នូវទំនិញទាំងអស់ ដើម្បីធានាសុវត្ថិភាពចំណីអាហារជូនប្រពលរដ្ឋផងដែរ។
ឯកឧត្តមបានបញ្ជាក់ថា អាជីវករមួយចំនួននៅតែដាក់តាំងលក់ទំនិញ របស់ខ្លួនមានការហួសកាលបរិច្ឆេទកំណត់ ដោយមិនបានយកចិត្តទុកដាក់ពីសុខភាពអ្នកប្រើប្រាស់ ហើយបើទស្សន៍ជាយ៉ាងណាក៏ដោយមន្ត្រីជំនាញនៅតែចុះត្រួតពិនិត្យ និងធ្វើការណែនាំពីផលប៉ះពាល់សុខភាពអ្នកប្រើប្រាស់ជាប្រចាំម្យ៉ាងវិញ ទៀតអ្នកលួចនាំចូលទំនិញខូចគុណភាពគិតតែផលប្រយោជន៍ផ្ទាល់ខ្លួន ដោយមិនគិតពីសុខភាពអ្នកដទៃ គឺសមត្ថកិច្ចជំនាញតែងតែទប់ស្កាត់បានទាន់វេលា។
ឯកឧត្តមបានបន្តថា ក្នុងនាម មន្ត្រីជំនាញនៅតែបន្តធ្វើការអប់រំផ្សព្វផ្សាយ ដោយផ្ទាល់តាមរយៈការបិទផ្សាយរូបភាពជាបន្តទៀតដើម្បីឱ្យអ្នកលក់ និងអ្នកប្រើប្រាស់បានយល់កាន់តែច្បាស់ ពីការប៉ះពាល់សុខភាពមកលើអ្នកបរិភោគទាំងអស់គ្នា និងទប់ស្កាត់អ្នកនាំចូលទំនិញខូចគុណភាពហួសកាលបរិច្ឆេទមកចែកចាយតាមទីផ្សារបន្តទៀត ចំណែកអ្នកប្រើប្រាស់ត្រូវត្រួតពិនិត្យឱ្យបានច្បាស់លាស់មុននឹងទិញទំនិញអ្វីមួយយកទៅបរិភោគដែលអាចខូចសុខភាពខ្លួនឯងផងដែរ ៕