ឯកឧត្តមជា ចាន់តូ ទេសា ភិបាលធនាគារជាតិនៃកម្ពុជាបាន ប្រកាសឱ្យពលរដ្ឋ ទាំងអស់ប្រយ័ត្នឱ្យបានខ្ពស់ចំពោះការចងការប្រាក់ក្រៅប្រព័ន្ធ(មិនមានច្បាប់អនុញ្ញាតត្រឹមត្រូវពីធនាគារជាតិនៃកម្ពុជាឬស្ថាប័នណាមួយ) ព្រោះបច្ចុប្បន្ននេះកំពុងមានជន ឆ្លៀតឱកាសបានកឹបកេងចំណេញទៅលើការរកស៊ីចងការប្រាក់ក្រៅប្រព័ន្ធនេះ ។
ការប្រកាសបែបនេះរបស់ ឯកឧត្តមទេសាភិបាល ធ្វើឡើងនាឱកាស ដែលលោកអញ្ជើញចូលរួមក្នុងពិធីប្រកាសតែងតាំងនាយកសាខាធនាគារជាតិនៃកម្ពុជាខេត្តបន្ទាយ លោក ថាសុទ្ធា ជំនួសលោក ហេង ទួងដែលទើបតែចូលនិវត្ត នាព្រឹកថ្ងៃទី២២ ខែឧសភា ឆ្នាំ២០១៨។
ឯកឧត្តមទេសាភិបាលបានឱ្យ ដឹងថា “ទន្ទឹមនឹងការរីកចម្រើននៃវិស័យមីក្រូហិរញ្ញវត្ថុក៏មាន ជនមួយចំនួនកំពុងកេងចំណេញ ដោយប្រើនសារយោបាយប្រភិថុតតាមរយៈការឃោសនាឱ្យប្រជាពលរដ្ឋយល់ច្រឡំថា គ្រឹះស្ថានមីក្រូហិរញ្ញវត្ថុជារបស់រដ្ឋមិនតែ ប៉ុណ្ណោះពួកគេ បានដើរបោកបញ្ឆោតពលរដ្ឋ មិនបាច់សងប្រាក់ប្រសិនបើគេឈ្នះឆ្នោតឬ ឃោសនាប្រាក់សន្សំពីប្រជាពលរដ្ឋដោយសន្យាឱ្យអត្រាការប្រាក់ខ្ពស់ជាដើម តែទីបំផុតពួកគេបានរត់គេចខ្លួនបាត់នេះជាសកម្មភាពមិនស្របច្បាប់ ធ្វើឱ្យពលរដ្ឋខាតបង់យ៉ាងធំធេង និងត្រូវមានការប្រុងប្រយត្ន័ឱ្យខ្ពស់” ។
ក្នុងឱកាសនោះ ឯកឧត្តម ជា ចាន់តូក៏បានបង្ហាញឱ្យដឹងពីការកើនឡើងនៃការប្រើប្រាស់ប្រាក់រៀលនាពេលបច្ចុប្បន្ន ។ ឯកឧត្តមបានលើកឡើងថា កន្លងមករាជរដ្ឋាភិបាល និងធនាគារជាតិនៃកម្ពុជា បានដាក់ចេញនូវវិធានការលើកកម្ពស់ ការប្រើប្រាស់ប្រាក់រៀលជាបន្តបន្ទាប់ ដោយមានការចូលរួមពីវិស័យឯកជន និងពលរដ្ឋទូទៅ ហើយក្នុងនោះកំណើននៃតម្រូវការប្រាក់រៀលបានកើនឡើងគួរឱ្យកត់សម្គាល់។
ជាក់ស្តែងរូបិយវត្ថុចរាចរណ៍និងប្រាក់បញ្ញើនៃប្រាក់រៀលបាន កើនឡើងក្នុងអត្រា១៨%និង២៧% រៀងគ្នាផងដែរ។ ក្នុងនោះតាម រយៈកំណើនអត្រាទទួលបាននិង ប្រើប្រាស់សេវាហិរញ្ញវត្ថុផ្លូវការព្រមទាំងបានផ្តល់កម្ចីដល់អតិថិជនប្រមាណជិត១,៨លាននាក់និង ទទួលប្រាក់បញ្ញើពីអ្នកផ្ញើប្រាក់ជាង១,៧លាននាក់ជាមួយសេវាយ៉ាង ទូលំទូលាយទូទាំងផ្ទៃប្រទេស។
ឯកឧត្តមទេសាភិបាលក៏បាន បញ្ជាក់ទៀតថា ការរីកចម្រើនក្នុងវិស័យធនាគារនេះ អាស្រ័យដោយប្រទេសជាតិមានសន្តិភាពទើបទទួលបាការជឿជាក់ និងការចូលរួមគាំទ្រពីប្រជាជននិង សាធារណៈជន ៕
