មណ្ឌលគិរី ៖ ផ្ទះឈើប្រក់ស័ង្កសីទំហំ៥ម៉ែត្រគុណ៧ម៉ែត្រ ត្រូវបានលោក ថន ម៉េងស្រ៊ា នាយរងសេនាធិការនៃតំបន់ប្រតិបត្តិការសឹករងមណ្ឌលគិរី ដឹកនាំកម្លាំងក្រោមឱវាទសហការជាមួយប្រជាពលរដ្ឋក្នុងភូមិ ពូរ៉ាប៉ែត ឃុំក្រង់តេះ ស្រុកពេជ្រាដា សាងសង់ថ្មីជូនលោកយាយចាស់ជរាម្នាក់ដែល រងគ្រោះក្នុងហេតុការណ៏ខ្យល់កន្ត្រាក់បណ្តាលឲ្យខ្ទមរបស់គាត់បាក់ រាបដល់ដី កាលពីថ្ងៃទី១៨ មេសា ២០១៦ ។
លោក ផុន ប៊ុនស៊ី ប្រធានភូមិពូរ៉ាប៉ែតបានឲ្យដឹងថា នៅល្ងាចថ្ងៃទី១៨ មេសា នៅមូលដ្ឋានភូមិរបស់លោក មានភ្លៀងធ្លាក់មួយមេយ៉ាងធំ ដែលលាយឡំជាមួយនឹងខ្យល់កន្ត្រាក់។លោកបន្តថា ក្រោយពីស្ងប់ស្តាត់ភ្លៀងផ្គរបន្តិច លោកក៏បានចុះពិនិត្យមើលក្នុងភូមិដែលលោកគ្រប់គ្រងឃើញមាន ផ្ទះប្រជាពលរដ្ឋជាច្រើនខ្នងត្រូវបាន ខ្យល់បោលបក់ធ្វើឲ្យដួលរលំ នឹងខូចខាតមធ្យមអស់ប្រមាណ៣៦ខ្នងផ្ទះ ។ ហើយនៅពេលនេះ ផ្ទះមួយចំនួនធំដែលពលរដ្ឋមានលទ្ឋិភាពកំពុងសាងសង់ខ្លួនឯងរួច មួយចំនួនហើយ ដោយឡែកតែលោកយាយ តិះ អ៊ីម អាយ៧៩ឆ្នាំ ដែលជីវភាពខ្វះខាត ត្រូវបានអ្នកភូមិនឹងសប្បុរសជនកំពុងជួយ សង់ផ្ទះថ្មីជូនលោកយាយដើម្បីរស់នៅបានសមរម្យ។
លោកវរសេនីយ៏ទោ ថន ម៉េងស្រ៊ា នាយរងសេនាធិការនៃតំបន់ប្រតិបត្តិការសឹករងមណ្ឌលគិរីបានមានប្រសាស ន៏ថា ដោយមានការចង្អុលបង្ហាញពីលោក ឧត្តមសេនីយ៏ត្រី ឃិន ម៉េងស្រេង មេបញ្ជាការតំបន់ប្រតិបត្តិការសឹករងមណ្ឌលគិរី លោកបានដឹកនាំកម្លាំងទាហាន១០នាក់ នឹងយកសម្ភារៈមួយចំនួន ដើម្បីទៅសាងសង់ផ្ទះជូនលោកយាយ ដែលកំពុងជួបការលំបាក នឹងមានជំងឺប្រចាំកាយផងនោះ។លោកបានបន្តថា កងទ័ពមិនត្រឹមតែមានតួនាទីការពារទឹកដីនោះទេ កងទ័ពក៏បានចូលរួមចំណែកក្នុងកិច្ចការសង្គម ការអភិវឌ្ឍន៏លើគ្រប់វិស័យ ជាពិសេសការរួមចំណែកកាត់បន្ថយភាពក្រីក្ររបស់ប្រជាពលរដ្ឋ។
ក្នុងថ្ងៃនោះដែរលោកវរសេនីយ៏ទោ ថន ម៉េងស្រ៊ា ក៏បាននាំយកអំណោយទៅជូនលោកយាយ តិះ អ៊ីម មួយចំនួនផងដែរដើម្បីជួយសម្រាលជីវភាពរបស់គាត់ ៕
