ភ្នំពេញ ៖ សាកសពបុរសម្នាក់ ត្រូវក្រុមកម្មករសំណង់ប្រទះឃើញដេកស្លាប់ក្នុងបន្ទប់ឡៅតឿ បង្កឱ្យមានការភ្ញាក់ផ្អើល កាលពីវេលាម៉ោង៧ និង១៥នាទីព្រឹកថ្ងៃទី១៤ ខែឧសភា ឆ្នាំ២០២០នេះ ស្ថិតនៅចំណុចក្នុងបុរីពិភពថ្មី៣ ផ្លូវលេខ០៦ ផ្ទះលេខ៦៦ ភូមិប្រការ សង្កាត់ព្រៃស ខណ្ឌដង្កោ។
បុរសរងគ្រោះឈ្មោះ ហេង ប៊ុនថេង អាយុ៣៨ឆ្នាំមុខរបរបុគ្គលិកក្រុមហ៊ុន ស្នាក់នៅផ្ទះកើតហេតុខាងលើ។
បុរសជាកម្មករម្នាក់ឈ្មោះ អោប ធារិទ្ធ ភេទប្រុស អាយុ៣៤ឆ្នាំ បានឲ្យដឹងថា នៅព្រឹកថ្ងៃកើតហេតុរូបគេ និងក្រុមការងារ៦នាក់ទៀត ត្រូវបានម្ចាស់បុរីជួលឲ្យពួកគាត់ទៅបោសសម្អាតផ្ទះខាងលើ។ ពេលពួកគាត់មកដល់ ឃើញផ្ទះខ្ទាស់សោពីក្នុង ពួកគាត់ក៏បានគាស់កញ្ចក់ដើម្បីយកសោចូលទៅសម្អាត។ ពេលនោះគ្នាគាត់ម្នាក់បានឡើងទៅបន្ទប់ឡៅតឿ ស្រាប់តែប្រទះឃើញសពបុរសម្នាក់ដេកស្លាប់ហើយក៏បានរាយការណ៍ទៅសន្តិសុខក្នុងបុរី សន្តិសុខក៏បានរាយការណ៍ទៅសមត្ថកិច្ចមូលដ្ឋានដើម្បីចុះមកពិនិត្យសព។
ចំណែកស្ត្រីជាប្រពន្ធសព ឈ្មោះយ៉ែម រស្មី អាយុ២៩ឆ្នាំ ស្នាក់នៅភូមិព្រែកលៀប សង្កាត់ព្រែកលៀប ខណ្ឌជ្រោយចង្វា បានអះអាងថា សពបុរសរងគ្រោះជាប្តីរបស់នាង។ រូបនាងនិងប្ដីបានទិញផ្ទះកើតហេតុខាងលើបង់រំលស់ តែអត់មានលុយបង់ឲ្យខាងបុរី ចំនួន៣ខែ ខាងបុរីបានដកហូតយកផ្ទះវិញ ។
បន្ទាប់មក ជនរងគ្រោះជាប្ដី និងរូបនាងមានជម្លោះឈ្លោះប្រកែកគ្នា រហូតធ្វើឱ្យបុរសជាប្តីចាកចោលផ្ទះ ហើយនាងបានទៅដាក់ពាក្យបណ្ដឹងលែងលះនៅសង្កាត់ជ្រោយចង្វា តែបុរសជាប្ដីមិនបានទៅផ្ដិតមេដៃនោះទេ ។
លុះនៅព្រឹកថ្ងៃទី១៤ ខែឧសភា ឆ្នាំ២០២០ រូបនាងជាប្រពន្ធទទួលបានដំណឹងពីខាងម្ចាស់បុរីខលទៅប្រាប់នាងថា មានមនុស្សស្លាប់នៅក្នុងផ្ទះនាងដែលបានទិញកន្លងមក ។ ពេលមកដល់ ទើបដឹងថាបុរសជាប្ដីបានស្លាប់ពិតប្រាកដមែន ។
ក្រោយពេលកើតហេតុ សមត្ថកិច្ចជំនាញកោសល្យវិច័យ ចុះមកពិនិត្យសាកស ទើបដឹងថាជនរងគ្រោះបានធ្វើអត្តឃាតដោយខ្លួនឯងដោយលេបថ្នាំងងុយដេកជាច្រើនគ្រាប់ដោយសារតែសមត្ថកិច្ចរកឃើញសំបកថ្នាំងងុយដេកនៅជាប់នឹងខ្លួនជនរងគ្រោះ។
សាកសពជនរងគ្រោះត្រូវបានសមត្ថកិច្ចធ្វើលិខិតប្រគល់ទៅឱ្យក្រុមគ្រួសារយកទៅធ្វើបុណ្យតាមប្រពៃណី ៕
